ЦІХАНОВІЧ (ТИХАНОВИЧ) Іосіф Аўсенцевіч

[1877, в. Хатынічы Пінскага пав. Мінскай губ. — ?], свяшчэннаслужыцель. Беларус. Скончыў Мінскую духоўную семінарыю (1898?). Служыў у Магілёўскай губ. Арыштаваны 19.9.1937 у в. Вярэйцы Асіповіцкага р-на Магілёўскай вобл. Праходзіў па адной справе са святарамі Мікалаем Вярыгам, Даніілам Каржанеўскім, Мікалаем Заўсцінскім, Сімяонам Зяленскім, старастам і актыўнымі прыхаджанамі. Асуджаны 20.10.1937 з інш. святарамі тройкай НКВД за «антысавецкую прапаганду» да 10 гадоў ППК. Далейшы лёс невядомы. Рэабілітаваны 1.9.1963 пастановай Магілёўскага абл. суда. Групавая справа Ц. і інш. № 8901 захоўваецца ў архіве УКДБ Магілёўскай вобл.

Кр.: НАРБ, ІКБР; БНДЦЭД.