СТРАТАНОВІЧ (СТРАТАНОВИЧ) Мікалай

[1880, в. Лучын Рагачоўскага пав. Магілёўскай губ., цяпер Рагачоўскі р-н Гомельскай вобл. — ?], святар (?), сын Іаана Фёдаравіча Стратановіча*. Скончыў духоўную семінарыю. Да арышту жыў з братам Яўгенам, сёстрамі Наталляй, Лізаветай, Верай. Арыштаваны 12.3.1923. Асуджаны калегіяй АДПУ 22.6.1923 за «нелегальны пераход дзяржаўнай мяжы» і як «падазроны ў шпіянажы» да 3 гадоў ППК. Этапаваны ў Салавецкі канцлагер АДПУ Архангельскай вобл. Вызвалены пастановай АДПУ 2.8.1926, але пазбаўлены права жыць у 12 вызначаных гарадах. Далейшы лёс невядомы. Рэабілітаваны ваенным пракурорам Беларусі 8.6.1992. Асабовая справа С. № 34162-с захоўваецца ў архіве КДБ Беларусі.

Кр.: НАРБ, ІКБР.