ЦІМАШЭНКАВА Вольга Андрэеўна

[1921, в. Літвінава (?), цяпер Яршыцкі р-н Смаленскай вобл., Расія — ?], навуковец. З сялянскай сям’і. Мела незакончаную вышэйшую адукацыю. Працавала аэролагам ў Мінскай (Беларускай) дзяржаўнай абсерваторыі. У час 2-й сусветнай вайны заставалася на акупаванай тэрыторыі. Арыштавана 14.9.1949 у Мінску па адрасе: вул. Пушкіна, д. 68. Асуджана асобай нарадай пры МДБ 22.4.1950 за «супрацоўніцтва з нямецкімі акупантамі» да 8 гадоў ППК. Этапавана ў Вяцкі канцлагер МДБ Кіраўскай вобл. Вызвалена 18.11.1954. Далейшы лёс невядомы. Рэабілітавана прэзідыумам Мінскага абл. суда 21.6.1989. Асабовая справа Т. № 23917-с з фотаздымкам захоўваецца ў архіве КДБ Беларусі.