ШВЕДЭР Віктар Іосіфавіч

[1895, Пскоў, Расія — 22.6.1952 (?), Казахстан, ГУЛАГ], навуковец. З сям’і рабочага. Атрымаў вышэйшую адукацыю. Падчас арышту навуковы супрацоўнік БелАН. Быў жанаты, меў дзіця. Арыштаваны 28.3.1933 у Мінску па адрасе: Галантарэйны зав., д. 26, кв. 2. Асуджаны паводле пастановы калегіі АДПУ 19.8.1933 як «член контррэвалюцыйнай арганізацыі» да 5 гадоў ППК. Этапаваны ў Карагандзінскі (?) канцлагер НКВД Казахскай ССР. Верагодна, быў асуджаны паўторна. Загінуў у зняволенні. Рэабілітаваны судовай калегіяй па крымінальных справах Вярхоўнага суда БССР 5.11.1963. Асабовая справа Ш. № 18145-с з фотаздымкам захоўваецца ў архіве КДБ Беларусі.