ТРАХАНОВІЧ (ТРОХАНОВИЧ) Іакаў Арцем’евіч

[1883, в. Астражанка Мазырскага пав. Мінскай губ., цяпер Лельчыцкі р-н Гомельскай вобл. — 28.4.1942, ГУЛАГ], свяшчэннаслужыцель. Беларус. З сялянскай сям’і. У 1920-я г., верагодна, служыў у Георгіеўскай царкве в. Прылепы Мінскага пав., цяпер Смалявіцкі р-н Мінскай вобл. Арыштаваны 9.1.1933. Асуджаны 16.1.1933 з настаяцелем царквы Яўфіміем Паўлоўскім, старастам і актыўнымі прыхаджанамі асобай нарадай АДПУ за «контррэвалюцыйную дзейнасць» дa 5 гадоў ППК з канфіскацыяй маёмасці. Этапаваны ў адзін з канцлагераў АДПУ Іванаўскай вобл. Загінуў у зняволенні. Рэабілітаваны 31.5.1989 пракуратурай БССР. Групавая справа Т. і інш. № 25544-с захоўваецца ў архіве КДБ Беларусі.

Кр.: НАРБ, ІКБР; БНДЦЭД.