ВЯРЫГА (ВЕРИГО) Мікалай Якаўлевіч

[1875, мяст. Пагост Слуцкага пав. Мінскай губ., цяпер Салігорскі р-н Мінскай вобл. — ?]. Беларус. З духоўнага саслоўя. Служыў псаломшчыкам у Свята-Іаанаўскай царкве ў родным мястэчку. 8.3.1915 рукапаложаны ў дыякана, потым ў іерэя. У 1930-я г., верагодна, служыў у Касма-Даміянаўскім храме ў мяст. Асіповічы, цяпер райцэнтр Магілёўскай вобл. Арыштаваны 18.9.1937. Праходзіў па адной справе са святарамі Мікалаем Заусцінскім, Сімяонам Зяленскім, Даніілам Каржанеўскім, Іосіфам Ціхановічам, старастам і  актыўнымі прыхаджанамі царквы. Асуджаны 20.10.1937 тройкай НКВД за «антысавецкую прапаганду» да 10 гадоў ППК. Рэабілітаваны 1.9.1963 пастановай Магілёўскага абл. суда. Групавая справа В. і інш. святароў № 8901 захоўваецца ў архіве УКДБ Магілёўскай вобл.

Кр.: Памятная книжка Минской епархии.