РЫЖКОЎ (РЫЖКОВ) Уладзімір Іванавіч

[1871, в. Малыя Баўкі (Боўкі) Быхаўскага пав. Магілёўскай губ., цяпер в. Боўкі Быхаўскага р-на Магілёўскай вобл. — кастр. 1937 (?), Магілёў, турма НКВД]. Беларус. З сялянскай сям’і. Скончыў духоўную семінарыю, рукапаложаны ў іерэя. Прызначаны ў Свята-Троіцкую царкву ў мяст. Дуброўна Горацкага пав. Магілёўскай губ., цяпер райцэнтр Віцебскай вобл. З 1912 настаяцель Мікалаеўскага храма ў мяст. Крычаў Чэрыкаўскага пав. Магілёўскай губ., цяпер райцэнтр Магілёўскай вобл. У 1920-я г. — ва Успенскай царкве в. Машанакі Горацкага пав., цяпер Магілёўскі р-н. Ухіліўся ў абнаўленчы раскол, але неўзабаве прынёс пакаянне архіепіскапу Магілёўскаму Паўліну (Крошачкіну) і  вернуты ў зносіны з кананічнай Царквой. Працягваў служыць ва Успенскай царкве, пакуль у 1933 улады не адмовілі ў рэгістрацыі храма. Арыштаваны ў 1937 у Магілёве. Асуджаны 28.9.1937 тройкай НКВД за «контррэвалюцыйную дзейнасць» да ВМП з канфіскацыяй маёмасці. Расстраляны. Рэабілітаваны 9.4.1966 Магілёўскім абл. судом. Групавая справа Р. і інш. № 9171 захоўваецца ў архіве УКДБ Магілёўскай вобл.

Кр.: Памятная книжка Могилевской губернии; НАРБ, ІКБР; БНДЦЭД; Шиленок Д., свящ. Из истории православной церкви в Белоруссии (1922—1939). Мн., 2006.