ПАЦЯЮК (ПАТЕЮК) Міхаіл Мікітавіч

[1887, в.Новая Беліца (Навабеліца), цяпер у межах Гомеля — ?], святар. Беларус. Скончыў духоўную семінарыю. Да арышту, верагодна, служыў у Аляксандра-Неўскай царкве ў роднай вёсцы. Быў жанаты, меў дачку Надзею (н. ў 1913) і сына Дзмітрыя (1916). Арыштаваны 4.4.1933. Асуджаны калегіяй АДПУ 9.6.1933 за «антысавецкую агітацыю» і як «удзельнік контррэвалюцыйнай царкоўна-паўстанцкай арганізацыі» да 5 гадоў ППК. Вызвалены ў 1938. Вярнуўся на радзіму. Зноў арыштаваны 23.6.1941. Прыгавораны асобай нарадай НКВД да 5 гадоў ППК. Далейшы лёс невядомы. Рэабілітаваны пракуратурай БССР 17.7.1989. Групавая справа П. і інш. № 27605-с захоўваецца ў архіве КДБ Беларусі.

Кр.: НАРБ, ІКБР.

[Паводле кнігі: т. II, с. 154–155]