ЧУЛКЕВІЧ (ЧУЛКЕВИЧ) Уладзімір Фёдаравіч

[1870 — 14.10.1937, Мазыр, турма НКВД]. Верагодна, сын Фёдара Ісакавіча Чулкевіча*. Скончыў Магілёўскую духоўную семінарыю, рукапаложаны ў іерэя. Служыў другім святаром, з 1908 настаяцелем Міхайлаўскай царквы в. Кашалёва (Буда-Кашалёва) Рагачоўскага пав. Магілёўскай губ., цяпер райцэнтр Гомельскай вобл., з 1911 благачынны цэркваў 2-й акругі Рагачоўскага пав. У 1920-я г. настаяцель Раства-Багародзіцкага храма в. Валосавічы (тагачасны паштовы адрас: ст. Азарычы) Бабруйскага пав., цяпер Акцябрскі р-н Гомельскай вобл. Узнагароджаны нагрудным крыжам (1924). У першай палове 1930-х г. настаяцель царквы в. Балажэвічы Мазырскага р-на Гомельскай вобл. Арыштаваны ў Мазыры ў сярэдзіне 1930-х г. Асуджаны да ВМП. Расстраляны.

Кр.: Памятная книжка Могилевской губернии; НГАБ, ф. 2786, в.  1, с. 67; Памяць: Гісторыка-дакументальная хроніка Мазыра і Мазырскага раёна. Мн., 1997.