АРАМОВІЧ Ігнат Мікалаевіч

[? — 1875], педагог, мемуарыст, удзельнік паўстання 1863—64. З 1859 настаўнік матэматыкі ў Беластоцкай гімназіі. Належаў да рэвалюцыйнай арганізацыі і актыўна ўдзельнічаў у падрыхтоўцы ўзброенага выступлення супраць царскіх улад. З крас. 1863 ад’ютант пры паўстанцкім ваенным начальніку Гродзенскага ваяв. Паплечнік і нязменны спадарожнік В.Урублеўскага. Увосень 1863 з ім і рэшткамі гродзенскіх паўстанцаў адышоў на тэрыторыю Польшчы (Любліншчыну). У студз. 1864, пасля разгрому атрадаў В.Урублеўскага, эміграваў. Апублікаваў (у Швейцарыі) падрабязныя ўспаміны пра паўстанне на Гродзеншчыне, у якіх апісаў баявыя дзеянні паўстанцаў, прыезд К.Каліноўскага да іх, змясціў тэксты бел. песень паўстанцаў. У 1872 вярнуўся ў Расію, быў арыштаваны і сасланы. Памёр у Казані.

Тв.: Marzenia. Pamiкtnik o ruchu partyzanckim w wojewуdztwie Grodzieсskim w 1863 i 1864 r. Bendlikon. 1865.

Літ.: ЭГБ, т. 1.