ПЯТРУЛІН (ПЕТРУЛИН) Іларыён Ермалаевіч

[1880, в. Палошкава Клімавіцкага пав. Магілёўскай губ., цяпер Клімавіцкі р-н Магілёўскай вобл. — ?]. Беларус. У пачатку 1900-х г. выкладаў у 2-класнай прыходскай школе пры Пакроўскай царкве в. Пачынічы Клімавіцкага пав. (тагачасны паштовы адрас: ст. Пятровічы), цяпер Смаленская вобл., Расія. 20.9.1906 вытрымаў экзамен на дыякана і прызначаны ва Успенскі храм мяст. Астроўна Сенненскага пав. Магілёўскай губ., цяпер Бешанковіцкі р-н Віцебскай вобл. Рукапаложаны ў іерэя. З 1911 настаяцель Георгіеўскай царквы в. Буй Сенненскага пав., цяпер Сенненскі р-н Віцебскай вобл. Быў жанаты, меў двое дзяцей. Арыштаваны 8.3.1928. Асуджаны 8.6.1928 асобай нарадай пры АДПУ за «антысавецкую агітацыю» дa 3 гадоў высылкі ў Нарымскі край. Далейшы лёс невядомы. Рэабілітаваны 4.6.1992 пракуратурай Віцебскай вобл. Асабовая справа П. № 22086-п захоўваецца ў архіве УКДБ Віцебскай вобл.

Кр.: Памятная книжка Могилевской губернии; НАРБ, ІКБР.

[From the book: vol. II, p. 191]