МАРДВІЛКА (МОРДВИЛКО) Пётр Канстанцінавіч

[1875, в. Ліцвяны Мінскага пав., цяпер Дзяржынскі р-н Мінскай вобл. — ?], бацька навукоўца і перакладчыка Аркадзя Мардвілкі і, верагодна, сын Канстанціна Мардвілкі*. Беларус. Скончыў Мінскую духоўную семінарыю (1896?). З канца 1890-х г. псаломшчык, з 1903 настаяцель Спаса-Праабражэнскага храма в. Языль Бабруйскага пав. Мінскай губ., цяпер Старадарожскі р-н Мінскай вобл. З ліп. 1914 член будаўнічага камітэта цэркваў 3-й акругі Бабруйскага пав. Быў жанаты, меў двое дзяцей. Арыштаваны 14.3.1933 у Слуцку па адрасе: вул. 4-я Працоўная, д. 20. Асуджаны 9.6.1933 з 20 святарамі асобай нарадай пры АДПУ як «член контррэвалюцыйнай арганізацыі і за антысавецкую агітацыю» дa 3 гадоў пазбаўлення волі. Этапаваны ў Беламорска-Балтыйскі канцлагер АДПУ Карэльскай АССР. Вызвалены 14.3.1936. Далейшы лёс невядомы. Рэабілітаваны 17.7.1989 пракуратурай БССР. Групавая справа М. і інш. № 27605-с захоўваецца ў архіве КДБ Беларусі.

Кр.: Памятная книжка Минской губернии; Памятная книжка Минской епархии; Личный состав епархиального управления; НГАБ, ф. 2786, в. 1, с. 67.