ПАЛАНЕВІЧ Гіпаліт

[псеўд.: Г.Няміга; 10(23).7.1907, Мінскі пав., цяпер Мінскі р-н — 24.10.1997, ЗША], бел. грамадска-культурны дзеяч, гісторык, педагог. Скончыў СШ у Мінску, Ленінградскі педагагічны інстытут (1932). Быў рэпрэсіраваны, у 1936—40 вязень Ухта-Іжэмскага канцлагера НКВД Комі АССР. Пасля вызвалення працаваў у школе. Падчас нямецкай акупацыі прымаў удзел у бел. нацыянальным падполлі. З 1944 у эміграцыі. У 1946—50 супрацоўнік бел. гімназіі імя Я. Купалы ў Міхельсдорфе (Зах. Германія). З 1950 жыў у ЗША. Працаваў у сістэме нью-йоркскіх бібліятэк. Быў супрацоўнікам Інстытута па вывучэнні гісторыі і культуры СССР (Мюнхен).

Тв.: Інстытут беларускай культуры — Беларуская Акадэмія навук — Акадэмія навук БССР. Мюнхен, 1957.

Літ.: Св. памяці Гіпаліт Паланевіч // Беларус (Нью-Ёрк). 1997. № 449; БЭ, т. 11.