ХАРЫТАНОВІЧ Васіль Канстанцінавіч

[1911, Баранавічы — ?, ГУЛАГ], аграном, бацька пісьменніка Юрыя Станкевіча (прозвішча па маці). Атрымаў вышэйшую адукацыю. У пачатку 2-й сусветнай вайны мабілізаваны ў Чырвоную армію. Пад Барысавам трапіў у палон. Сядзеў у нямецкім канцлагеры, адкуль уцёк. Арыштаваны ў 1945. Зняволены ў Барысаўскай турме МДБ. Асуджаны як «член БНС» і за «правядзенне мерапрыемстваў антысавецкай скіраванасці» да 10 гадоў ППК. Этапаваны ў Карагандзінскі канцлагер МДБ Казахскай ССР. Далейшы лёс невядомы.