ГРЭЦКІ Іван Мікалаевіч

[1898, мяст. Косава Слонімскага пав. Гродзенскай губ., цяпер Івацэвіцкі р-н Брэсцкай вобл. — 1937 (?), НКВД], удзельнік нацыянальнага і рэвалюцыйнага руху ў Зах. Беларусі. У 1924—27 сакратар падпольнага райкама КПЗБ у Палескім ваяв. Арыштаваны польскімі ўладамі ў 1927. У 1928 завочна абраны выбаршчыкамі дэпутатам польскага Сейма, у сувязі з чым вызвалены з турмы. У Сейме стаў адным з кіраўнікоў фракцыі і нацыянальна-вызваленчай арганізацыі «Змаганне», абраны яе сакратаром. Зноў арыштаваны 30.8.1930 за дзейнасць у «Грамадзе», асуджаны да 8 гадоў пазбаўлення волі. У выніку абмену палітвязнямі ў 1932 перададзены савецкаму боку. Жыў у Мінску. Арыштаваны НКВД. Загінуў у зняволенні.

Кр. геагр.: Рапановіч. Слоўнік геаграфічных назваў.

Літ.: Bergman A. Sprawy białoruskie w II Rzeczypospolitej. Warszawa, 1984. S. 50—51, 160; ЭГБ, т. 3; БЭ, т. 5.

[From the book: vol. III, book 1, pp. 328–329]