МІХАЛЬЧЫК Рыгор Севасцьянавіч

[1898, в. Вербалаты Слонімскага пав. Гродзенскай губ., цяпер Слонімскі р-н Гродзенскай вобл. — ?], лекар, верагодна, брат Аляксандра Міхальчыка. З сялянскай сям’і. Атрымаў вышэйшую медыцынскую адукацыю. Падчас арышту асістэнт Хірургічнай клінікі. Быў жанаты, гадаваў дваіх дзяцей. Арыштаваны 5.4.1933 у Мінску па адрасе: вул. Савецкая, д. 133, кв. 3. Асуджаны асобай нарадай пры НКВД 10.8.1933 як «член нацдэмаўскай арганізацыі» да 3 гадоў ППК. Далейшы лёс невядомы. Рэабілітаваны судовай калегіяй па крымінальных справах Вярхоўнага суда БССР 24.8.1956. Асабовая справа М. № 14618-с з фотаздымкам захоўваецца ў архіве КДБ Беларусі.