БЛІЗНЮК Любоў Іванаўна

[1921, в. Дрычын Ігуменскага пав. Мінскай губ., цяпер Пухавіцкі р-н Мінскай вобл. – ?]. З сялянскай сям’і. Атрымала сярэднюю адукацыю. Падчас 2-й сусветнай вайны заставалася на акупаванай тэрыторыі, працавала настаўніцай школы в. Мацеевічы Пухавіцкага р-на. Выйшла замуж. Арыштавана 23.12.1944. Асуджана 24.12.1945 за “супрацоўніцтва з нямецкімі акупантамі” да 3 гадоў ППЛ. Этапавана ў Паўночна-Уральскі лагер МДБ Свярдлоўскай вобл. Вызвалена 31.12.1945, верагодна, па амністыі. Рэабілітавана. Далейшы лёс невядомы. Асабовая справа Б. № 32137-с захоўваецца ў архіве КДБ Беларусі.